معلومة مهمة جدًا: مش كل الإنسولين زي بعض!!

• وما ينفعش نبدّل بينهم بنفس الطريقة

• فيه نوع ينفع يتاخد ونبدأ ناكل فورًا

• وفيه نوع لازم نستنى شوية بعده

• لو استخدمناهم بنفس الطريقة، السكر ممكن يعلى أو يحصل هبوط

نفهمها كحكاية بسيطة

تخيّل إن جسم الطفل محتاج:

• حاجة شغالة طول اليوم تحافظ على التوازن

• وحاجة سريعة تيجي مع كل وجبة

لما الاتنين يشتغلوا مع بعض السكر يفضل مظبوط

لو حصل تغيير في نوع الإنسولين لازم ناخد بالنا إن:

• مواعيد الحقن ممكن تختلف

• توقيت الأكل ممكن يتغير

وعشان كده أي تغيير يكون تحت متابعة الطبيب

معلومة مهمة جدًا!!

مش كل الأطفال زي بعض، فيه طفل كل وحدة تنزل 50 وفيه أقل أو أكتر

الرقم ده بيختلف حسب:

• سن الطفل

• نشاطه

• حالته الصحية

والدكتور هو اللي بيحدد الرقم المناسب لكل طفل

قواعد أمان مهمة

علشان نتجنب الهبوط أو الزيادة:

•  ما نكررش جرعة تصحيح قبل مرور 2–3 ساعات من آخر جرعة سريعة

• ما نزودش الجرعة بسرعة أو بشكل عشوائي

• نراعي الظروف دي:

1. بعد مجهود أو لعب

2. لو الطفل مش بيأكل كويس

3. قبل النوم

نقطة مهمة جدًا

• التصحيح لازم يكون بهدوء

• الهدف إن السكر ينزل تدريجي، مش بسرعة

• لأن النزول السريع ممكن يسبب هبوط

ببساطة خالص

1. قيس السكر

2. لو عالي، احسب الفرق

3. زوّد بحساب، مش تقدير

متى لا نعمل تصحيح؟

في بعض الحالات، الأفضل ننتظر شوية قبل ما ندي جرعة تصحيح:

1. بعد جرعة إنسولين سريعة مباشرة

• لو الطفل أخد جرعته من قليل  👈 نستنى 2–3 ساعات قبل ما نعيد التصحيح

• علشان:

  • الإنسولين لسه شغال في الجسم

  • ولو زدنا عليه ممكن يحصل هبوط

2. بعد الأكل مباشرة

• بعد الأكل السكر طبيعي يعلى شوية 👈 نستنى ساعتين بعد بداية الأكل قبل الحكم

3. بعد مجهود أو لعب

• الحركة بتزوّد تأثير الإنسولين

• التصحيح وقتها ممكن ينزل السكر زيادة

4. لو الطفل مش بيأكل كويس

• لو الشهية قليلة أو رافض الأكل 👈 أي زيادة في الإنسولين ممكن تعمل هبوط

5. قبل النوم

• لازم نكون حذرين جدًا 👈 لأن الهبوط أثناء النوم ممكن مايتلاحظش بسرعة

معلومة مهمة جدًا

• الهدف إن السكر ينزل بهدوء وتدريجي

• ❌  مش بسرعة  ❌ مش بزيادة

• 👈 الزيادة في الجرعة ممكن تعمل هبوط خطر

ببساطة: لو مش متأكد… الأفضل تستنى وتقيس تاني بعد شوية بدل ما تزود بسرعة

 زاوية الحقن

• غالبًا 90 درجة

• لو الطفل نحيف جدًا ← ممكن نميل الإبرة شوية

نقطة مهمة

• الحقن مش لازم يكون مؤلم، ولو فيه ألم شديد أو تورم متكرر، يبقى نراجع المكان أو الطريقة

معلومة بسيطة

الإنسولين لازم يدخل تحت الجلد، مش في العضل، علشان يشتغل بشكل مظبوط

ببساطة خالص

• اختار مكان مناسب

• غيّر المكان كل مرة خليك هادي وخد وقتك

التعامل مع انخفاض السكر (الهبوط)

إمتى نقول إن فيه هبوط؟

• لو السكر أقل من 70

نعمل إيه فورًا؟

1. ندي حاجة فيها سكر سريع:

• عصير

• معلقة سكر أو عسل

2. نستنى 10- 15 دقيقة

3. نقيس السكر تاني

لو لسه منخفض؟

• نكرر نفس الخطوات تاني

بعد ما السكر يتحسن؟

• لو فيه وجبة قريبة ← الطفل ياكل عادي

• لو مفيش ← ممكن ندي حاجة خفيفة فيها نشويات

⚠️ حالة طارئة ⚠️

لو الطفل:

• فاقد الوعي

• أو مش قادر يبلع

ما نحطش أي حاجة في بقه ❗❗ 👈 لازم تدخل طبي فورًا

مهم تعرف: 

• الهبوط ممكن يحصل لأي طفل، لكن التعامل السريع بيحل المشكلة بسهولة

السكر أثناء المرض

لو الطفل عنده دور برد أو سخونية:

• نقيس السكر أكتر من المعتاد

• ما نوقفش الإنسولين

• نشجع الطفل يشرب سوائل

إمتى نرجع للدكتور؟

• لو السكر عالي باستمرار

• لو فيه قيء أو رفض للأكل

• لو الطفل تعبان بشكل واضح

إمتى نقيس السكر؟

• قبل الأكل

• بعد الأكل بساعتين

• قبل النوم

• لو الطفل حاسس بأعراض

تخزين الإنسولين

القلم المفتوح (اللي بنستخدمه حاليًا)

• ممكن يفضل بره التلاجة

• يُحفظ في مكان بعيد عن الشمس والحر

• صالح للاستخدام لمدة حوالي 28 يوم

👈 الأفضل نحطه في مكان بارد داخل البيت (مش قريب من البوتاجاز أو الشمس)

في الجو الحار 🌡️

لو الجو حر جدًا (خصوصًا في الصيف): 👈  ممكن نحفظ القلم المفتوح في التلاجة

لكن:

• نخرجه قبل الحقن بـ 10–15 دقيقة

• ما يكونش متجمد

مهم جدًا ⚠️

• ما يتسابش في العربية أو في الشمس

• ما يتحطش في الفريزر

• الحرارة العالية ممكن تضعف مفعول الإنسولين

القلم غير المفتوح

• يُحفظ في التلاجة (في الرف العادي مش الفريزر)

• درجة الحرارة المناسبة: من 2 إلى 8 درجات

• 👈 صالح لحد تاريخ الصلاحية

علامات لازم ننتبه لها

لو لاحظت:

• تغير في اللون

• وجود شوائب أو تكتلات

👈 الأفضل ما نستخدمهوش

ببساطة:

الإنسولين دواء حساس للحرارة

• الحرارة العالية تضعف تأثيره

• التبريد المناسب يحافظ عليه

كلمة مهمة

في الأول الموضوع ممكن يبقى صعب شوية وده طبيعي جدًا

مع الوقت…

هتفهموا جسم طفلكم

وهتتعاملوا معاه بسهولة